தமிழ் சினிமாவின் முன்னணி இயக்குனரான லோகேஷ் கனகராஜ், தற்போது சூப்பர் ஸ்டார் ரஜினிகாந்தை வைத்து இயக்கியுள்ள ‘கூலி’ திரைப்படம் ஆகஸ்ட் 14 அன்று வெளியாகவுள்ள நிலையில், சினிமா வட்டாரத்தில் ஒரு அதிரடி அறிவிப்பை வெளியிட்டுள்ளார். ஆம், லோகேஷ் கனகராஜ் இயக்குனராக மட்டுமல்லாமல், தற்போது கதாநாயகனாகவும் அறிமுகமாகிறார்!
அருண் மாதேஸ்வரன் இயக்கத்தில் ‘கேங்ஸ்டர்’ அவதாரம்!
‘ராக்கி’, ‘கேப்டன் மில்லர்’ போன்ற படங்களை இயக்கி தனக்கென ஒரு தனி முத்திரையைப் பதித்த அருண் மாதேஸ்வரன் இயக்கத்தில் உருவாகும் ஒரு கேங்ஸ்டர் படத்தில் லோகேஷ் கனகராஜ் கதாநாயகனாக நடிக்கிறார். இந்தப் படத்தை பேஷன் ஸ்டுடியோஸ், ஜி ஸ்குவாட் மற்றும் தி ரூட் ஆகிய நிறுவனங்கள் இணைந்து தயாரிக்கின்றன என்ற தகவல் ஏற்கனவே வெளியாகி இருந்தது.
‘கைதி 2’வுக்கு முன் ஒரு மாஸ் படம்!
இது குறித்து லோகேஷ் கனகராஜ் கூறுகையில், “எனது அடுத்த பிரம்மாண்ட படைப்பான ‘கைதி 2’ படத்தைத் தொடங்குவதற்கு இன்னும் 8 மாதங்கள் இடைவெளி உள்ளது. இந்த இடைப்பட்ட காலத்தில், அருண் மாதேஸ்வரன் இயக்கத்தில் உருவாகும் இந்த கேங்ஸ்டர் படத்தில் நடிக்கிறேன். இந்தப் படத்திற்காக எனது உடல் எடையைக் குறைத்து, மார்ஷியல் ஆர்ட்ஸ் எனப்படும் தற்காப்புக் கலையில் பயிற்சி பெறுவதற்காக கடந்த சில மாதங்களாக தாய்லாந்தின் புக்கெட் பகுதியில் தீவிர பயிற்சி மேற்கொண்டு வருகிறேன்” என்று தெரிவித்துள்ளார்.
பெரும்பாலும் அதிரடி மற்றும் ஆக்ஷன் நிறைந்த கேங்ஸ்டர் கதைகளை இயக்கி வரும் லோகேஷ், இப்போது ஒரு நடிகராகவும் அதே ஜானரில் களமிறங்குவது ரசிகர்களிடையே பெரும் எதிர்பார்ப்பை கிளப்பியுள்ளது. லோகேஷ் கனகராஜ் ஒரு நடிகராகவும் தனது முத்திரையைப் பதிப்பாரா என்பதைப் பொறுத்திருந்து பார்ப்போம்!
