தமிழ் சினிமாவின் சர்ச்சை நாயகியாக வலம் வரும் வனிதா விஜயகுமார், தனது புதிய திரைப்படம் குறித்து அனல் பறக்கும் ஒரு சவாலை விடுத்துள்ளார். “என் படத்திலிருந்து ஒரு காட்சியைக் கூட ‘காப்பி’ என நிரூபிக்க முடிந்தால், நான் திரைத்துறையை விட்டே விலகுகிறேன்!” என அவர் பகிரங்கமாக அறிவித்துள்ளது கோடம்பாக்கத்தில் பெரும் பரபரப்பை ஏற்படுத்தியுள்ளது.
பிரபல நடிகர் விஜயகுமாரின் மகளாக சினிமாவில் அறிமுகமாகி, பின்னர் நீண்ட இடைவெளிக்குப் பிறகு விஜய் டிவியின் பிக்பாஸ் நிகழ்ச்சி மூலம் மீண்டும் பிரபலமானவர் வனிதா. அதன் பிறகு ரியாலிட்டி ஷோக்கள், நடுவர் பணிகள், சொந்தத் தொழில் என செம பிஸியாக இருந்தார்.
பிக்பாஸ் நிகழ்ச்சியில் சம்பாதித்த பணத்தை முதலீடாகக் கொண்டு, தனது மகள் ஜோவிகா தயாரிக்க, வனிதா இயக்குநராக அறிமுகமாகியுள்ள படம் ‘Mrs & Mr’. கடந்த ஜூலை 11 ஆம் தேதி வெளியான இந்தப் படம், தற்போது கலவையான விமர்சனங்களைப் பெற்று வருகிறது.
இந்நிலையில், சமீபத்தில் ஒரு பேட்டியில் பேசிய வனிதா, வழக்கம்போல தனது அதிரடியான பாணியில் சவால் விடுத்தார். “நான் உங்களுக்கு ஒரு சவால் விடுகிறேன். முதலில் என்னுடைய படத்தை பாருங்கள். அதன் பிறகு என்னை என்ன திட்டினாலும் நான் வாங்கிக் கொள்கிறேன். என் படத்தில் இருக்கும் எல்லா விஷயங்களும் (கண்டென்ட்) என்னுடைய சொந்த, ஒரிஜினல் கண்டென்ட். என் படத்திலிருந்து ஒரு காட்சியையாவது ‘காப்பி’ என்று உங்களால் நிரூபிக்க முடியுமா? அப்படி நிரூபித்தால், நான் இந்த திரைத்துறையை விட்டே நிரந்தரமாக விலகுகிறேன்! நான் எந்தப் படத்திலிருந்தும் ஒரு காட்சியையும் திருடவில்லை. நீங்கள் படத்தை பார்த்தால் தான் அது புரியும்” என ஆணித்தரமாகக் கூறியுள்ளார்.
வனிதா விஜயகுமாரின் இந்த அனல் பறக்கும் சவால், ‘Mrs & Mr’ திரைப்படம் குறித்த பேசுபொருளை மேலும் அதிகரித்துள்ளது. அவரது இந்த சவாலை திரையுலகம் மற்றும் ரசிகர்கள் எப்படி எடுத்துக் கொள்ளப் போகிறார்கள் என்பதைப் பொறுத்திருந்துதான் பார்க்க வேண்டும்.