ரஷ்யா உக்ரைன் மீது தனது தாக்குதல்களைத் தீவிரப்படுத்தி வருகிறது. அந்த வகையில், உக்ரைனின் கார்கிவ் பிராந்தியத்தில் அமைந்துள்ள லோசோவா (Lozova) நகரில் ரஷ்யா நடத்திய கடுமையான தாக்குதலில், இரண்டு குழந்தைகள் உட்பட பல பொதுமக்கள் காயமடைந்துள்ளதாக அதிகாரிகள் தெரிவித்துள்ளனர்.
ரஷ்யப் படைகள் 30க்கும் மேற்பட்ட ஷாஹெட் ரக ட்ரோன்கள் மூலம் லோசோவா ரயில் நிலையப் பகுதியைக் குறிவைத்து தாக்குதல் நடத்தியுள்ளனர். இந்தத் தாக்குதலில், ரயில் நிலையக் கட்டிடம், குடியிருப்பு கட்டிடங்கள் மற்றும் தனியார் வீடுகள் பலத்த சேதமடைந்துள்ளன. இந்தத் தாக்குதல், போரின் ஆரம்பத்திலிருந்து லோசோவா மீது நடத்தப்பட்ட மிகப்பெரிய தாக்குதல் என நகர கவுன்சில் தலைவர் செர்ஹி செலன்ஸ்கி குறிப்பிட்டுள்ளார்.
இந்தத் தாக்குதலில் ஒரு ரயில்வே ஊழியர் உயிரிழந்ததாகவும், மேலும் நான்கு ரயில்வே ஊழியர்கள் காயமடைந்ததாகவும் உக்ரைனின் மாநில ரயில்வே நிர்வாகம் தெரிவித்துள்ளது. இந்தத் தாக்குதலில் காயமடைந்தவர்களில் 13 வயது சிறுமியும், 14 வயது சிறுவனும் அடங்குவதாக கார்கிவ் பிராந்திய அரசுத் தரப்பு வழக்கறிஞர் அலுவலகம் தெரிவித்துள்ளது.
இந்தத் தாக்குதலுக்குப் பிறகு, லோசோவாவின் பல பகுதிகளில் மின்சாரம் மற்றும் தண்ணீர் விநியோகம் துண்டிக்கப்பட்டுள்ளது. மீட்புப் பணிகளும், சேதமடைந்த பகுதிகளைச் சீரமைக்கும் பணிகளும் தொடர்ந்து நடைபெற்று வருவதாக அதிகாரிகள் தெரிவித்துள்ளனர்.
ரஷ்யாவும் உக்ரைனும் பொதுமக்கள் மீது தாக்குதல் நடத்துவதை மறுத்து வருகின்றன. ஆனால், இதுபோன்ற சம்பவங்கள் பொதுமக்கள் மற்றும் குழந்தைகள் போரின் மிகப்பெரிய பாதிப்பிற்கு உள்ளாவதை மீண்டும் ஒருமுறை உலகிற்கு உணர்த்தியுள்ளது.
