சிலியில் காணாமல் போன சுரங்கத் தொழிலாளர்களைத் தேடி வந்த மீட்புக் குழுவினர், ஒருவரின் உடலை மீட்டுள்ளனர். இதன் மூலம், கடந்த வியாழக்கிழமை அன்று ஏற்பட்ட சுரங்க விபத்தில் உயிரிழந்தவர்களின் எண்ணிக்கை இரண்டாக உயர்ந்துள்ளது.
சிலியில் உள்ள உலகின் மிகப்பெரிய நிலத்தடி செப்புச் சுரங்கமான எல் டெனியன்டே (El Teniente) சுரங்கத்தில், கடந்த வியாழக்கிழமை அன்று 4.2 ரிக்டர் அளவில் மிதமான நிலநடுக்கம் ஏற்பட்டது. இந்த நிலநடுக்கத்தால், சுரங்கத்தின் ஒரு பகுதி இடிந்து விழுந்தது. இதில், ஒரு தொழிலாளி சம்பவ இடத்திலேயே உயிரிழந்தார். மேலும், ஐந்து தொழிலாளர்கள் சுரங்கத்திற்குள் சிக்கிக்கொண்டனர்.
சுரங்க விபத்து குறித்து தகவல் கிடைத்ததும், மீட்புக் குழுவினர் உடனடியாக களத்தில் இறங்கினர். 100-க்கும் மேற்பட்ட வல்லுநர்கள் கொண்ட குழு, சுரங்கத்திற்குள் சிக்கியுள்ள மற்ற நான்கு தொழிலாளர்களைத் தேடி வருகின்றனர்.
கடந்த சனிக்கிழமை அன்று, தேடுதல் பணியின் போது, ஐந்து பேரில் ஒருவரின் உடல் மீட்கப்பட்டதாக சுரங்க நிர்வாகம் தெரிவித்துள்ளது. இந்தச் செய்தி, காணாமல் போனவர்களின் குடும்பத்தினருக்கு ஆழ்ந்த வருத்தத்தை ஏற்படுத்தியுள்ளது. மீட்கப்பட்ட உடலை அடையாளம் காணும் பணி நடந்து வருவதாக அதிகாரிகள் தெரிவித்தனர்.
இந்தச் சம்பவம் குறித்து சிலி அரசு விசாரணைக்கு உத்தரவிட்டுள்ளது. நிலநடுக்கம் இயற்கையாக ஏற்பட்டதா அல்லது சுரங்கப் பணிகளால் ஏற்பட்டதா என்பது குறித்து அதிகாரிகள் ஆய்வு செய்து வருகின்றனர். சுரங்கத்தின் பாதுகாப்பு விதிமுறைகள் மீறப்பட்டதா என்பது குறித்தும் விசாரணை நடத்தப்பட்டு வருகிறது. இந்த விபத்தால், சுரங்கத்தில் பணிகள் அனைத்தும் தற்காலிகமாக நிறுத்தி வைக்கப்பட்டுள்ளன.
