ஸ்காட்லாந்தில் உள்ள பிரிட்டனின் அணு ஆயுதத் தளமான ராயல் நேவியின் HMNB Clyde-ல், மிகவும் தீவிரமான அணுசக்தி விபத்து ஒன்று நிகழ்ந்திருப்பது தெரியவந்துள்ளது. இந்தச் சம்பவம் ‘Category A’ என்ற மிக உயர்ந்த அச்சுறுத்தல் கொண்டதாக வகைப்படுத்தப்பட்டுள்ளது. இதுகுறித்து முழு விவரங்களையும் வெளியிடுமாறு பாதுகாப்பு அமைச்சகத்திடம் (MoD) கோரிக்கை விடுக்கப்பட்டுள்ளது.
‘Category A’ என்றால் என்ன?
பாதுகாப்பு அமைச்சகத்தின் வரையறையின்படி, ‘Category A’ என்பது அணுசக்திப் பொருட்கள் சுற்றுச்சூழலில் கசியக்கூடும் அல்லது கசிய அதிக வாய்ப்புள்ள மிகவும் தீவிரமான நிகழ்வுகளைக் குறிக்கிறது. ஜனவரி 1 முதல் ஏப்ரல் 22, 2025 வரையிலான காலகட்டத்தில் இந்த விபத்து நடந்திருப்பதாகத் தகவல்கள் தெரிவிக்கின்றன.
மக்களுக்கு அபாயம் இல்லை என்கிறதா அரசு?
அணு ஆயுத எதிர்ப்பு ஆர்வலர்கள் மற்றும் அரசியல் தலைவர்கள் இந்தக் கசிவு குறித்து அச்சம் தெரிவித்துள்ள நிலையில், பாதுகாப்பு அமைச்சகம் இந்த நிகழ்வு ‘பாதுகாப்பு முக்கியத்துவம் குறைவானது’ என்றும், பொதுமக்களுக்கோ அல்லது சுற்றுச்சூழலுக்கோ எந்த அபாயத்தையும் ஏற்படுத்தவில்லை என்றும் கூறியுள்ளது. இருப்பினும், விபத்தின் தன்மை குறித்து எந்த விவரத்தையும் வெளியிட அது மறுத்துவிட்டது.
முந்தைய சம்பவங்கள்:
கடந்த சில ஆண்டுகளாக, ஃபஸ்லேன் மற்றும் அருகில் உள்ள RNAD Coulport தளங்களில் பல அணுசக்தி விபத்துகள் பதிவாகியுள்ளன. 2023ஆம் ஆண்டிலும் ஒரு ‘Category A’ விபத்து பதிவானது குறிப்பிடத்தக்கது. 2019ஆம் ஆண்டில், பழைய குழாய்களில் ஏற்பட்ட கோளாறு காரணமாக Coulport தளத்திலிருந்து கதிரியக்க நீர் கடலில் கசிந்ததையும் ஒரு விசாரணை வெளிப்படுத்தியுள்ளது.
பிரிட்டன் அரசாங்கத்தின் மீதான அழுத்தம்:
இந்த தொடர் சம்பவங்களால் பிரிட்டன் அரசு மீது விமர்சனங்கள் வலுத்து வருகின்றன. ஸ்காட்டிஷ் தேசியக் கட்சியின் துணைத் தலைவர் கீத் பிரவுன், “அணு ஆயுதங்கள் ஒரு தொடர்ச்சியான ஆபத்து. இந்த புதிய தகவல்கள் மிகவும் கவலைக்குரியவை” என்று கூறியுள்ளார். இந்த விவகாரம் குறித்து பிரிட்டன் அரசாங்கம் உடனடியாக விளக்கமளிக்க வேண்டும் என கோரிக்கை விடுக்கப்பட்டுள்ளது. தேசிய பாதுகாப்பு காரணங்களுக்காக விவரங்களை வெளியிட முடியாது என்று பாதுகாப்பு அமைச்சகம் கூறினாலும், இந்த மர்மமான விபத்துக்கள் குறித்த கேள்விகள் அதிகரித்துள்ளன.
