கீவ்: ரஷ்யாவின் இரக்கமற்ற ட்ரோன் தாக்குதல்களால் உக்ரைன் திணறிக்கொண்டிருந்த வேளையில், போர்க்களத்தின் விதியையே மாற்றி எழுதக்கூடிய ஒரு பிரம்மாண்ட தொழில்நுட்பத்தை உக்ரைன் களமிறக்கியுள்ளது. இது, ரஷ்யாவின் ஆளில்லா விமானங்களை (ட்ரோன்களை) வானிலேயே செயலிழக்கச் செய்யும் ஒரு தரைவழி ரோபோவாகும். இதன் வருகையால் ரஷ்ய ராணுவம் பெரும் அதிர்ச்சியில் உறைந்துள்ளது.
உக்ரைனின் தொழில்நுட்ப நிறுவனமான ‘க்வெர்டஸ்’ (Kvertus) உருவாக்கியுள்ள இந்த எந்திரத்திற்கு ‘AD பெர்செர்க்’ (AD Berserk) என்று பெயரிடப்பட்டுள்ளது. பெயருக்கு ஏற்றார்போலவே இது ஒரு அசுர சக்தி கொண்ட எந்திரம். இது வெறும் ரோபோ அல்ல; இது ட்ரோன்களுக்கு எமனாக விளங்கும் ஒரு நடமாடும் மின்னணுக் கோட்டை!
வானத்தையே வளைக்கும் மாயக்கவசம்!
இந்த ‘பெர்செர்க்’ எந்திரத்தின் மிகப்பெரிய பலம், அது தன்னைச் சுற்றி ஒரு தடுக்க முடியாத மின்னணு சுவரை உருவாக்குவதுதான். இந்த எந்திரம் இயங்கும்போது, அதன் சக்திவாய்ந்த ஆன்டெனாக்கள் ட்ரோன்களைக் கட்டுப்படுத்தப் பயன்படுத்தப்படும் அனைத்து விதமான ரேடியோ அலைகளையும் (frequencies) துண்டித்துவிடுகின்றன.
ரஷ்யாவின் உளவு பார்க்கும் FPV ட்ரோன்கள், குண்டு வீசும் ட்ரோன்கள் என எதுவாக இருந்தாலும், இந்த எந்திரத்தின் அருகே வந்தவுடன் அதன் மூளை ஸ்தம்பித்து, கட்டுக்கடங்காமல் செயலிழந்துவிடும். கிட்டத்தட்ட 1.5 கிலோமீட்டர் தொலைவில் வரும் ட்ரோன்களைக் கூட அதன் கட்டுப்பாட்டை இழக்கச் செய்யும் அசுர சக்தி இதற்கு உண்டு.
போர்க்களத்தின் புதிய பாதுகாவலன்!
இந்த எந்திரம் ட்ரோன்களிடமிருந்து பாதுகாப்பது மட்டுமல்லாமல், போர்க்களத்தில் வீரர்களின் உயிருக்கும் கவசமாக விளங்குகிறது.
- பிரம்மாண்ட எடை: சுமார் 700 கிலோ எடையைச் சுமந்துகொண்டு, மணிக்கு 25 கிலோமீட்டர் வேகத்தில் சீறிப்பாயும் திறன் கொண்டது.
- உயிர் காக்கும் வாகனம்: ட்ரோன் தாக்குதல் அபாயம் மிகுந்த பகுதிகளில் காயமடைந்த வீரர்களைப் பாதுகாப்பாக மீட்பதற்கும், ஆயுதங்கள் மற்றும் அத்தியாவசியப் பொருட்களைக் கொண்டு செல்வதற்கும் இது ஒரு வரப்பிரசாதமாக அமைந்துள்ளது.
- பாதுப்பான இயக்கம்: வீரர்கள் 20 கிலோமீட்டர் தொலைவில் இருந்து கூட ஃபைபர் ஆப்டிக் கேபிள் மூலம் இதை இயக்க முடியும் என்பதால், உயிர்ப் பலி என்ற பேச்சுக்கே இடமில்லை.
குவியும் ஆர்டர்கள்!
இந்த அசுர எந்திரத்தின் திறனைக் கண்டு வியந்த உக்ரைன் ராணுவம், டஜன் கணக்கில் ஆர்டர்களைக் குவித்துள்ளது. இது குறித்து பேசிய ‘க்வெர்டஸ்’ நிறுவனத்தின் தலைமை நிர்வாகி யாரோஸ்லாவ் ஃபிலிமோனோவ், “‘ஒவ்வொரு மாதமும் எங்கள் தொழில்நுட்பம் மேம்படுகிறது. எங்கள் இலக்கு ஒன்றுதான்: ரஷ்ய ட்ரோன்களிடமிருந்து எங்கள் வீரர்களையும், நிலத்தையும் பாதுகாப்பது, உயிர்களைக் காப்பது!’ என்று பெருமிதத்துடன் கூறியுள்ளார்.”
இந்த ‘பெர்செர்க்’ எந்திரங்களின் வருகை, ரஷ்யாவின் ட்ரோன் ஆதிக்கத்திற்கு ஒரு முற்றுப்புள்ளி வைக்குமா? போரின் போக்கை உக்ரைனுக்கு சாதகமாகத் திருப்புமா? ஒட்டுமொத்த உலகமும் உன்னிப்பாக கவனித்து வருகிறது.
