தைவான் விவகாரத்தில் அமெரிக்காவும் சீனாவும் போரில் ஈடுபட்டால் ஆஸ்திரேலியா என்ன பங்கு வகிக்கும் என்பதைத் தெளிவுபடுத்த வேண்டும் என்று அமெரிக்கப் பாதுகாப்புத் துறை (பென்டகன்) வலியுறுத்தியதாக வெளியான தகவல்களுக்குப் பதிலளித்த ஆஸ்திரேலியப் பாதுகாப்புத் தொழில் துறை அமைச்சர் பாட் கன்ராய், ஆஸ்திரேலியா எந்த மோதலிலும் முன்கூட்டியே படைகளை அனுப்பாது என்று திட்டவட்டமாகத் தெரிவித்துள்ளார்.
ஆஸ்திரேலியாவின் இறையாண்மைக்கு முன்னுரிமை அளிக்கப்படும் என்றும், “கற்பனைகளைப் பற்றி விவாதிப்பதில்லை” என்றும் கன்ராய் ஆஸ்திரேலிய ஒலிபரப்புக் கழகத்திற்கு அளித்த நேர்காணலில் கூறினார். “ஒரு மோதலுக்கு ஆஸ்திரேலியப் படைகளை அனுப்பும் முடிவு அன்றைய அரசால் எடுக்கப்படும், முன்கூட்டியே அல்ல” என்றும் அவர் வலியுறுத்தினார்.
ஃபைனான்சியல் டைம்ஸ் பத்திரிகை நேற்று முன்தினம் வெளியிட்ட அறிக்கையில், தைவான் மோதல் ஏற்பட்டால் ஆஸ்திரேலியா மற்றும் ஜப்பானிய பாதுகாப்பு அதிகாரிகளின் பங்கு குறித்து அமெரிக்காவின் கொள்கைக்கான துணைப் பாதுகாப்புச் செயலாளர் எல்ப்ரிட்ஜ் கோல்பி அழுத்தம் கொடுத்து வருவதாகக் குறிப்பிடப்பட்டுள்ளது. எனினும், தைவானைப் பாதுகாக்க அமெரிக்கா எந்தவிதமான நிபந்தனையற்ற உத்தரவாதத்தையும் வழங்கவில்லை.
ஆஸ்திரேலியப் பிரதமர் அந்தோனி அல்பானீஸ், பாதுகாப்பு மற்றும் வர்த்தகம் குறித்து விவாதிக்க இந்த வாரம் சீனத் தலைவர்களைச் சந்திப்பதற்காக ஷாங்காய் வந்தடைந்துள்ளார். இந்தச் சந்திப்புகளின்போது பாதுகாப்பு விவகாரங்கள் முக்கிய இடம்பிடிக்கும் என எதிர்பார்க்கப்படுகிறது.
இதற்கிடையில், சிட்னி துறைமுகத்தில் அமெரிக்காவுடன் இணைந்து ஆஸ்திரேலியாவின் மிகப்பெரிய போர் ஒத்திகை, “தாலிஸ்மேன் சேபர்” (Talisman Sabre) நேற்றைய தினம் தொடங்கியது. இதில் 19 நாடுகளைச் சேர்ந்த 30,000 துருப்புக்கள் பங்கேற்கின்றனர். சீனாவின் அணுசக்தி மற்றும் வழக்கமான படைகளின் இராணுவப் பெருக்கம் குறித்து ஆஸ்திரேலியா கவலை கொண்டுள்ளது என்றும், எந்த நாடும் ஆதிக்கம் செலுத்தாத ஒரு சமநிலையான இந்தோ-பசிபிக் பிராந்தியத்தை விரும்புவதாகவும் கன்ராய் தெரிவித்தார். “சீனா பிராந்தியத்தில் ஒரு இராணுவத் தளத்தைப் பாதுகாக்க முயல்கிறது, அது ஆஸ்திரேலியாவிற்கு குறிப்பாக உகந்த ஒன்றல்ல என்று நாங்கள் கருதுவதால், பிராந்தியத்திற்கு முதன்மைப் பாதுகாப்புப் பங்காளியாக இருக்க நாங்கள் கடுமையாக உழைத்து வருகிறோம்” என்றும் பசிபிக் தீவுகளைக் குறிப்பிட்டு அவர் கூறினார்.
கடந்த காலங்களில் செய்தது போல, சீனா கடற்படை இந்த ஒத்திகையை உளவு தகவல்களைச் சேகரிப்பதற்காக கண்காணிக்கும் வாய்ப்பு உள்ளது என்றும் கன்ராய் குறிப்பிட்டார். அமெரிக்கா, ஆஸ்திரேலியாவின் முக்கிய பாதுகாப்பு நட்பு நாடாகும். ஆஸ்திரேலியா வெளிநாட்டுத் தளங்களை அனுமதிக்கவில்லை என்றாலும், அமெரிக்க இராணுவம் தனது சுழற்சிமுறை இருப்பையும், எரிபொருள் சேமிப்பையும் ஆஸ்திரேலியத் தளங்களில் விரிவுபடுத்துகிறது. இது 2027 முதல் மேற்கு ஆஸ்திரேலியாவில் உள்ள துறைமுகத்தில் அமெரிக்க வெர்ஜீனியா நீர்மூழ்கிக் கப்பல்களை அனுமதிக்கும். தைவான் மீதான எந்தவொரு மோதலிலும் அமெரிக்கப் படைகளுக்கு ஆதரவளிப்பதில் இவை முக்கியப் பங்காற்றும் என்று ஆய்வாளர்கள் கூறுகின்றனர்.
